Act 26 | BOJ | STEP | Onaqa Agripa na Pol minjej, “Ni kamba ino anjam marimqa e quqwai.” Degsi minjnaqa Pol na aqa baŋ soqtosiqa endegsi marej,

Acts 26

Pol a Agripa aqa ulatamuq dia tigelosiq anjam marej

1 Onaqa Agripa na Pol minjej, “Ni kamba ino anjam marimqa e quqwai.” Degsi minjnaqa Pol na aqa baŋ soqtosiqa endegsi marej, 2 “O Mandor Koba Agripa, bini e ino ulatamuq endia tigelejunum. Anjam kalil Juda naŋgi na ijo jejamuq di qameleŋeqnub qaji di e na kamba marit ni que. Yimqa e areboleboleibqas. 3 Gago Juda kumbra kalil ni qalie. Iga anjam na qoteqnum qaji di dego ni qalie. Deqa ni ijo anjam endi quime. Ni asgimaiq.

4 “Juda tamo kokba kalil naŋgi ijo kumbra qa qalie unub. E aŋgro wala qa sosimqa e Judia sawaq dia kumbra kie yoqnem di naŋgi qalie. Bunuqna e Jerusalem qureq gilsim dia e kumbra kie yoqnem di dego naŋgi qalie. 5 Naŋgi nami ijo kumbra qa qaliesoqneb. Ni na naŋgi nenemnjrimqa degsib mermqab. Farisi naŋgo dal anjam dauryqajqa tulaŋ wau koba. Gago Juda gago dal anjam ti keresai. E aŋgro wala qa sosimqa e Farisi naŋgo ambleq di sosim e naŋgo kumbra dauryoqnem. Juda tamo kokba naŋgi di qalie. 6 Bini e ino ulatamuq endia tigelejunum. Di kiyaqa? E ijo areqalo Qotei qa siŋgilatosim anjam a nami gago moma naŋgi minjrej qaji di aqa damu brantqajqa deqa e tariŋoqnsim unum. Utru deqa naŋgi na e tigeltbonub. 7 Gago moma utru Jekop a na nami aqa aŋgro 12-pela naŋgi ŋambabtnjrej. Onaqa naŋgo leŋ kalil paraonabqa Qotei na naŋgi endegsi minjrej, ‘Mondoŋ e na niŋgi olo subq na tigeltŋgwai.’ Anjam deqa qujai iga bini gago areqalo siŋgilatejunum. Deqa qolo ti qanam ti iga Qotei qa siŋgila na louoqnsimqa aqa anjam geregere dauryeqnum. O Mandor Koba Agripa, mondoŋ iga olo subq na tigelqom. Anjam deqa qujai Juda tamo kokba naŋgi na ijo jejamuq di une qamsibqa e tigeltbonub. 8 Niŋgi qudei endegsib are qaleqnub kio, ‘Qotei na tamo naŋgi subq na tigeltnjrqasai?’ Niŋgi kiyaqa degsib are qaleqnub? Nuŋgo areqalo di bolesai.

9 “Bole, e segi nami Yesus Nasaret qaji aqa ñam ugeugeiyoqnsim jeutsi laqnem. 10 E Jerusalem qureq dia kumbra uge di yoqnem. Agi atra tamo kokba naŋgi na e odbeqnabqa e na Qotei aqa tamo uŋgasari naŋgi ojeleŋoqnsim tonto talq di breinjroqnem. Juda tamo kokba naŋgi na naŋgi ñumsib moiotnjrqa mareqnabqa e dego naŋgi koba na areqalo qujaitosim maroqnem, ‘Naŋgi ñumsib moiotnjriye.’ 11 E bati gargekoba Juda naŋgo Qotei tal kalil miligiq giloqnsimqa dia Yesus aqa tamo uŋgasari naŋgi ojeleŋoqnsim ugeugeinjroqnem. E endegsi are qaloqnem, ‘E naŋgi jaqatiŋ koba enjritqa naŋgi ulaosib Yesus qoreiyosib aqa ñam misiliŋyqab.’ Degsim are qaloqnsim deqa naŋgi ugeugeinjroqnem. E naŋgi qa minjiŋ ani oqetbeqnaqa naŋgi daurnjroqnsimqa qure isa isaq giloqnsim dia naŋgi itnjroqnsim ugeugeinjroqnem.

Pol a kiersi Kristen tamo brantej deqa sainjrej

12 “O Mandor Koba Agripa, e wau degsi yeqnamqa bati bei atra tamo kokba naŋgi na e qariŋbonabqa Damaskus qureq aiem. E aieqnamqa qanam jige puloŋ siŋgila koba minjal ti laŋ goge dena ijoq ainaq unem. A tulaŋ koba riaŋosiqa tamo e ombla aioqnem qaji naŋgi ti iga suwantgej. Aqa riaŋ di seŋ ti keresai. 14 Suwantgonaqa iga kalil ululoŋosim mandamq di ŋereŋem. E ŋeiesosimqa tamo bei aqa kakoro quem. A Hibru anjam na endegsi merbej, ‘O Sol, ni kiyaqa e ugeugeibeqnum? Ni e ugeugeibeqnum dena ino segi jejamu dego ugeugeiyeqnum. Ino segi qaja pulutosim ino jejamu qoruyqam dego kere.’ 15 Onaqa e na minjem, ‘O Tamo Koba, ni yai?’ Onaqa a na merbej, ‘E Yesus agi ni na ugeugeibeqnum qaji. 16 Deqa ni tigel. E ni giltmonum deqa ni ijo wau tamo sosimqa ijo siŋgila bini osormonum qaji deqa ti ijo siŋgila bunuqna osormoqnqai qaji deqa ti sawa sawa kalilq dia tamo uŋgasari naŋgi minjroqnsim laqnqam. Utru deqa e bini inoq di brantosim ni giltmonum. 17 Bunuqna e ni qariŋmitqa ni Juda tamo ti sawa bei bei qaji tamo ti naŋgoq giloqnqam. Deqa ni naŋgi qa ulaaim. E ni taqatmesoqnitqa naŋgi ni moiotmqasai. 18 Ni naŋgoq gilsim ijo anjam minjroqnimqa naŋgi e qa poinjroqnim ambru uratosib suwaŋoq bqab. Satan a na naŋgi joqej unu. Deqa ni na naŋgi are bulyetnjroqnimqa naŋgi Satan aqa siŋgila uratosib Qotei aqaq giloqnqab. Amqa e na naŋgo une kalil kobotetnjritqa naŋgi tamo uŋgasari nami e qa naŋgo areqalo siŋgilateb qaji naŋgi ti koba na ijo segi tamo uŋgasari boledamu sqab.’

Pol a nami Qotei aqa anjam palontosiqa tamo uŋgasari naŋgi minjroqnej a deqa Agripa saiyej

19 “Deqa Mandor Koba Agripa, laŋ goge dena puloŋ ainaqa e unsimqa anjam Yesus na merbej qaji di gotraŋyosai. 20 E aqa anjam di dauryosim tigelosim Damaskus qureq aiem. Aisim dia Qotei aqa anjam plaltoqnsimqa tamo uŋgasari naŋgi endegsi minjroqnem, ‘Niŋgi are bulyosib Qotei aqaq bosib nuŋgo kumbra uge uge kalil uratosib kumbra bole bole yoqniye. Amqa tamo uŋgasari naŋgi nuŋgo kumbra di unsib endegsi poinjrqas, “Bole, naŋgi bole are bulyonub.” ’ E Jerusalem dia, Judia sawaq dia, sawa bei beiq dia dego tamo uŋgasari naŋgi anjam degsi minjroqnem. 21 Utru deqa Juda tamo kokba naŋgi na atra tal miligiq dia e nubsibqa bosib e ojeb. Osib mareb, ‘Iga Pol qalsim moiotqom.’ 22 Ariya naŋgi degsib marsib e moiotbosai. Di kiyaqa? Qotei a nami e taqatboqnej agi bini e bole unum. Deqa bini e tamo kokba ti tamo laŋaj ti naŋgo ulatamuq endia tigelesosim Qotei aqa anjam palontosim minjreqnum. E anjam bei palontosaieqnum. Nami Qotei aqa medabu o tamo naŋgi Moses ombla na kumbra bunuqna branteleŋqas qaji di ubtsib neŋgreŋyoqneb. Anjam di segi e bini palonteqnum. 23 Agi Qotei aqa medabu o qaji tamo naŋgi nami anjam endegsib neŋgreŋyeb, ‘Kristus a jaqatiŋ koba osim moiqas. Moisimqa tamo kalil qa namoosim olo subq na tigelqas. Osim Juda tamo ti sawa bei bei qaji tamo naŋgi ti ambruq di soqnibqa naŋgi anjam minjroqnimqa naŋgi are bulyosib ambru uratosib suwaŋoq boqnqab.’”

Pol na Agripa minjej, “Ni Kristus qa ino areqalo siŋgilat.”

24 Pol a anjam degsi marsiq gileqnaqa Festus na aqa anjam gentosiqa leleŋosiq minjej, “Pol, ni nanarionum. Ino qalie kobaquja dena ni tulaŋ nanaritmqo.” 25 Onaqa Pol na minjej, “O Tamo Koba Festus, e nanariosai. Ijo anjam endi bole. E areqalo bole na anjam mareqnum.” 26 Osiqa Agripa minjej, “O Mandor Koba Agripa, ijo anjam endi ni nami qalieosim soqnem. Deqa e ni mermqa ulaosai. Yesus aqa kumbra iga dauryeqnum qaji di iga uli na yosaioqnem. Iga gaigai boleq na yoqnem. Deqa ni kumbra deqa geregere qalieonum. 27 O Mandor Koba Agripa, ni kiersi are qalonum? Qotei aqa medabu o tamo naŋgo anjam nami neŋgreŋyeb qaji di bole e? Od, e qalieonum, ni maronum, di bole.”

28 Onaqa Agripa na Pol nenemyej, “Ni kiersi are qalonum? Ni endego e are bulyosiy Kristen tamo brantqajqa merbonum e?” 29 Onaqa Pol na minjej, “Ni endego are bulyqam di kere. Sokobaiyosim are bulyqam di dego kere. Deqa e ni qa ti tamo kalil endia sosib ijo anjam queqnub qaji naŋgi qa ti endegsi Qotei pailyeqnum, ‘O Abu, ni na naŋgi are bulyetnjrimqa naŋgi e unum degsib sqab. Ariya e sil na tontbeb unum naŋgi degsib sqajqa e ni pailmosai.’ O Mandor Koba Agripa, e degsim Qotei pailyeqnum.”

30 Pol a na anjam degsiqa Agripa minjnaqa Festus wo Bernaisi wo tamo kalil awoeleŋesoqneb qaji naŋgi Agripa koba na tigelosib warumq dena oqedeb. Oqedosib endegsib qairosib mareb, “Iga Pol aqa jejamuq di une kobaquja bei unosaibolesai. Deqa iga na a qalsim moiotqa keresai. A tonto talq waiyqa keresai dego.” 32 Naŋgi degsib marsibqa Agripa na Festus minjej, “Pol a Sisar aqa ulatamuq di tigelqa marosai qamu ni na endego a tonto talq dena uratim oqedqo qamu.”